سالوفتي مع السعور في الإستراحه !!

اذهب الى الأسفل

سالوفتي مع السعور في الإستراحه !!

مُساهمة من طرف ريان الرس في 23rd يونيو 2010, 8:53 pm

سلااااام للغااالين



أبعدوووووو


بوووووووووم طاح عليكم موضوع اهبل اخبل ساامج لأبعد الحدود بس وش نسوي ربي بلشكم بواحد مقفل


7
7
7
وتكسرت سفينتهم على امواج المحيط الهندي
<<(( أروح وطي مع اللي علمك الاثارة ))


-____________-


انا دموعي أطفأت شموعي .. شاب مستقيم ساكن في بيت الوالد .. ومقيم مع الأهل من21سنه تقريبا ..
اغلب وقتي في الاستراحه مع الشباب .. متقاطين 4 شباب في استرااحه ..


والأجار له 3 شهوور مطوف وكل يومين متلاقطين مع راعي الاستراحه
>تسنه يلمح على طراره


سميناهاا استراحة غرفة التنس ( الحبل ) .. تقع أمام سوق الغنم .. خلف البقالة الي ماتبيع تتن ..
يحدها جنوباً ددسن موديل77 منقلب ..( الوصف أعتقد واضح .. سيروا علينا يالربع )



الاستراحه هذي عزيزه علي .. 23 ساعة ونصف يومياً فيهاا
لا طفشت من دنياي عسكرت بها ..


واذا حدتني ظروف الحياة وبغيت انقلب .. لجأت لها بعد الله وزال همي ..


::


خلوني بدااية اعطيكم نبذه عن ربع الاستراحه ..
مع تعريف صغير لكل وااحد :


حسوس (( أعزهم على قلبي ))
طفشون (( رومانسي ويحب يسمع مزنه ))
وديعوه (( انسان وش زينه و وش ملحه يهبل .. بس انه بعير ))



والرابع محسووبكم .. أبو جحلط زعيم الجلسه ..
كلنا أعماارنا بالعشرينات الا حسوس ..
كل ماسبق مقدمه.. قبل ماأتوطىء في بطن ام السالفه اللي راح اسردها لكم ..


_______________


مره من المرارير في ذاك اليوم لا بارك الله في ذاك اليوم ..
رجعت البيت الساعه 3 الفجر ..لقيت الباب مطرف ..
استغربت من اللي فاتحه هالحزهـ..


دزيت الباب ودخلت .. وتوني جااي ( أديوور )) وأصك الباب :
هجم علي الوالد من خلف النخله .. وبحركه من حركات جاكي شان
سدد لي وحده بالصدر .. خلتني ألصق في الباب .. وأصكه بظهري ..


وقف قداامي .. ومعه معصااد الجريش ..
وقال: جاي بانصاف الليالي وريحتك بلوت !!


قلت: روووقنا الله يجزااك خير لا تفضحناا .. فك و أفك


قال: شايفني ببسي ابو نص ريال ..؟؟ (( الوالد ذباته مااااش ماهو عارف يعبر ))


مسكني من شعري وتلني وخلاني أوقف قداامه زي الألف أ أ أ << يعني مثل تسذا ..
قال: هماني قايل لك احلق شعرك .. أنا اوريك ..


وحط رااسي بين سيقاانه ..
ومسكني من بطني ورفعني فوووق فووق هام السحب .. << قاعد يغني


متأثر باندرتيكر وهالمصارعه في دبي الرياضيه
ثم جيتك أمشي مليوون من فووووووووووق وعلى الأرض وآآه يا ظهري
قمت القط وجهي وبوكي ووجوالي وسبحتي الهلاليه ..


وقلت : الشرهه ماهيب عليكم .. الشرهه على اللي جاي يشوفكم ..
وطلعت زهقاااان .. وعلى وين يا أبو جحلط على وين ..؟؟
ما يبيلها .. إمسك خطك للإستراحه ..


___________________________


جيت الاسترااحه ..


ولقيت طفشون ومعه الاب توب ومافيه الا قوة هجوم على القرى الثانيه << ترايفان ..


و وديعوه قاعد يشاخر ..


قمت افرفر في القنوات واناظر رسايل هالمرااهقين وأتحمد ربي :


** محمد وحشتني افتح جوالك ودق عليا >الظاهر جداويه ..
تررى بامووت قسم فقدتك ياقاسي
( حبيبتك لمااا قلي )


** سعود الرياض..
ابي اتعرف على وحده رومانسيه وتسكن بالعليا > بيقابلها كعابي ..


** ميسوون الخبر:
ارجع ياكل الحب ارجع ياخلوودي مايصير كذا أنا مازعلت في حاجه ..



بصراحه طفشت منهم ..
فريت على الفضائيات الحكووميه .. وأثر البرامج الدينيه تدهر بهالفجريه ..!!
ولا صحوا الناس .. حطوا افلام واغاني ...


واذا نامواا.. حطوا برناامج فتااوي واحاديث !!!!


بيني وبينكم الدش مهوب صافي .. يقطع ..
والشاشه ترووح وتجي.. كل شوي ناقزه البحث عن الإشاره ..


قفلت التلفزيون وأخذت لي غفوة ..
جاني الهندي كومار حق الاسترااحه معه كيس صاامولي يصحي فيني:
بابا زوهلت بابا زوهلت... قووم "سئوور يجي " ..


رفعت الكااب عن وجهي .. صكيته طرااق .. قلت اطلع من سمااي مانيب ناقصك ..


قال: والله سئوور يجي ..
ناظرت الدريشه : النور بدا يشقشق والدجاج يبقبق ( ياهوه يانزار بن هذال ) ..
قلت له من هاللي جاي هالوقت !!


قال: سئوور كبير اسود
قلت: تكلم زين وش بك كأنك مقروص .. وهو يعيد علي نفس الجمله ..


قلت في نفسي : الله يرجه .. أكيد هالباكستاني حارس الاستراحه اللي جنبنا ( شورهان )..
جاي يبي زي العاده: سلف ملح .. وماجي وصلصه .. وجمر ..
وانا طالع .. صكيت باب الاسترااحه عشان مايدخل هالنشبه شورهان..
وانا قافله أخلاقي من بعد اللي صار لي مع الشايب ..


طلعت أناظر يمين .. يسار مالقيته .. وين راح شورهان ؟!!
قلت: أكيد ابطيت عليه ورجع استراحتهم ..
باروح له قبل يرجع ويصحيني وانا خرماان نوومه..


::


وهنا بدأت الحكاايه .. >بدري ياشيخ..


المهم..



مشيت !!
مشيت !!


وفجأة ..



وقفت بنص الشارع ..



ثم مشيت (( أخ يا اثارة هوليوود ))


والله وانا في الشارع والجو براد يتخلخل بين الضلوع سألت النفس :
وش جايبه شورهان هالصبحيه .. ؟؟


حتى اللي مستاجرين الاستراحه العاده يجون المغرب ويمشوون وحده الليل .. غريبه ..


وصلت استراحتهم لقيتهاا مقفله ولا فيه اي سيارة عند الباب ..
قلت .. الله يرجك يا كومار ماعمرك جبت العلم صامل ..


ورجعت اعقاابي لأني نعساان ..
وانا مديووور .. لمحت زووول اسود كبييير ..!!!!


والله صاادق كومار !!


وبديت اجمع حبل غسيل افكااري وأتذكر الكلام اللي سمعته من يومين :
(( يقولون فيه كلب اسود مسعور "سئوور" يدووج بهالحواري الصااده ويعض وياكل خلق الله ))


بلعت ريقي اللي نشف ..
وأمعنت النظر .. >نظرات الصقور


والنتيجه:
فعلاً .. أخوكم أبو جحلط أمام الكلب المسعوور وجهاً لوجه !!


** يقول الفيلسوف البلجيكي ضيف الله :
( أسوا شيء أن يداهمك الموت وانت لم تكتب وصيتك )




الكلب قدامي والأرض خلااا مابها احد ..
وعزرائيل مابيني وبينه الا ثوااني لا اكثر!!


قلت لنفسي :ياأبو جحلط حط رجلك لايتوحد فيك هالكلب !


" بس المشكله اني صكيت باب الاسترااحه ..
وإذا نحشت من قدامه أكيد بيلحقني هالرخمه .. وعلى ما أطق الباب
وأنتظر طفشون يسكر الاب توب حقه ويشيل السماعه ووديعوه يقوم من النوم ثم يفتحون ..


اكون وقتهاا نقانق بالمتبل الأثيوبي في بطن هالمسعور ..


أقترب الكلب المسعوور مني !! صار وجهي بوجهه .. وعيني بعينه ..
ودمعت عيني ودمعت عينه
كفاناا من زود الفرح هلت دمووع > شوفوا وين عقله فيه


للأسف .. من قراادة حظي .. ومن حسن حظ المسعوور ..
أني لما قررت الهرب .. لمحت الدلخ طفشون ووديعوه فوق سطح الملحق يوازنون الدش !!
يبوون يلحقوون على برناامج كل الرياضه ..


لما شافوني وجهاً لوجه امام الكلب ..
قاموا يصفرون ويشجعون .. وصاار طفشون يطق في صحن الدش ويغني لي
ووديع كل اللي اذكره انه استنزل على طق طفشون!!


.....


عااد انا زعيمهم واقواهم ..
فمن العار أهرب أمامهم .. << اي هين


وقررت المواجهه ( أخس يا بتال )


قلت في نفسي : الله واكبر يا أبو جحلط .. وش الكلب يعني ؟
مجرد قطو حجم عائلي ..!!


وش قطو .. الا فاار بس ( مورم حبتين ) ..
اهجم عليه وخلك ذيبٍ أقشر (( الله من الهلوسه )) ..



بنفس الوقت .. سمعت كومار البنقالي هو وربعه .. مسوين راابطه ويغنوون لي :
بابا زوحلت .. ياكلو > جحلط
هبه هبه .. ياكلك ...
مع وااهد فلفل .. هم همممم


والسيارات على الطريق العام تتفرج .. والمرور كثف الزحمه ( الله من زين الوصف )) ..
والهلكوبتراات فوقي تبااشر النتائج ..


وانا والمسعوور قباال بعض وكل وااحد محترم خصمه ..
قبل ان اهجم .. نغزني قلبي ويوم ألتفت وراي ..


واثر ((حسوس)) ينزل من الكراسيدا حقته ..


ويجي مسرع نااصي مكاان المعركه ويصرخ :
كله الا أبو جحلط ( قايل لكم اعز وااحد على قلبي )) ..
جااء حسوس مكيم يمشي مليون نااصي الكلب ..


الكلب مطنش وببروودة دم لما وصله حسوس ..
سوى له حركه عشوائيه خاطفه ....


و حسوس قداامي صار يخررر دم ( أفااااااا يا حسوس )


قام الكب يحك ظفووره .. وينفخ قذلته فوق عينه اليسرى ..


وناظر فيني وقالي :
هااه يالاطخم اسدحك جنب خويك .. ولا آكلك وأحط عضامك فوقه ؟! أختر ..
قلت : احذف الاجابتين بعدين هذا ما قد شفته ولا هوب خويي ولا يقرب لي ..
( جحدت حسوس مسكين بس للضروره أحكام) ..


قامت اسنانه تصرصر من الحمااس ..


رحت مسووي زيه ..


ومن قوة الدوس على اسناني ..
أنكسر نابي وطاح قدامه في ارض المعركه !!


قعد ينااظر حسوس وهو يتلوى بالأرض ..
استغليت الفرصه .. وبحركه نابعه من تأنيب الضمير الانسيابي : << ارحمنا


طمرت عليه وتشعبطت فوق ظهره .. وصفق لي الحضووور


قعدت اخنق فيه بحمااس ..
التفت علي ببرود .. وقال :
يالحبيب .. حمار عندك انا .. راكب ضهري !! .. توكل إستراحتكم لا أجرم فيك
وإذا براسك حب مانطحن أنزل وتطاق زي الآوادم ..



بصراحه أستحيت منه ونزلت وأنا متولم للنحشه ..
لكن انقلبت الأرض وصاارت سمااء ..
وصاارت رجلينه ويدينه في بطني وصدري .. ووجهي بوجهه ..


تذكرت بهالموقف رشدي اباضه ومديحه يسري ..
قلت له .. الله يستر من رومانسيتك ..


وفتح فمه وشفت انيابه .. أشهد ألا إله إلا الله
وأنقض على رقبتي ..


و ............. و .............


فاصل إعلاني
________________




..............




عدنا ..!!





طبيت على حسوس وخميته من الخوف ..


وسمعته يسب ويلعن !!
وسمعت صووت بوووري معلق .. من الخرشه


لا أخفيكم سراً أيضاً سمعت صووت فراامل عنيف جداً ..
دفني حسوس .. وهدأ السرعه .. ووقف يمين الخط ..
والتفت علي وعيوونه حمراء معصب ..!!


عسى ما شر يا أبو جحلط .. بغيت تخلينا نجيب العيد في هالتريله اللي من شوي ..
فركت عيوني .. قلت : سلامات عسى ما شر وش صاير ..


قال : انت مدري وش سالفتك .. من مسكنا خط ابوحدريه وأنت حلوووم :
وتقول رد الكلب .. هات الكلب ...


وبالأخير طلع حلم في حلم ..
لابارك الله باللي ياكل شكشوكه من زوله بالخطوط ..



وتوته توته خلصت الحتوته ..


_____________________


هيه انت وياه ..


لا ينط لي وااحد منكم ويسأل اسئله طلاب إبتدائيه ويقول :
اصلاً يانصاب الكلب مايتكلم .. هههههههههههههههههههههه




*معلومات اضافيه :
*جميع شخصيات الروايه حقيقيين ..
فقط السيناريو خراافي .. وفيه بعض التعديات على حقوق ناس مستاذن منهم
*هذا التحشيش إهدااااااء لشخصين عارفين أنفسهم
ونشكر لكم حسن الاستماع والانصات ..


عاد لا أوصيكم ياغاالين الله الله بالتقيم


avatar
ريان الرس
المدير العام
المدير العام

عدد المساهمات : 184
تاريخ التسجيل : 31/03/2010
العمر : 27
الموقع : الرس

معاينة صفحة البيانات الشخصي للعضو http://ryanalrrs.mountada.biz

الرجوع الى أعلى الصفحة اذهب الى الأسفل

رد: سالوفتي مع السعور في الإستراحه !!

مُساهمة من طرف R0oo0dy في 24th يونيو 2010, 1:36 am

avatar
R0oo0dy
نائب المدير العام
نائب المدير العام

عدد المساهمات : 185
تاريخ التسجيل : 31/05/2010

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى